好緊張！好緊張！好緊張！
我返學喇！I’m back to the school!
“可否聽日送我返學？” “No, I’m gonna work tomorrow dear, you can manage it no worries.”
自從n年前讀幼稚園時婆婆成日湊我返學放學，我好耐都未試過咁想有人送我返學。
知道自己要好似海綿泡泡一樣，不斷學習吸取知識先可持續自我增值。只係依家的我比兒時更懂什麼叫尷尬，何為面矇，或叫厚臉皮唔知醜，令我每日喺新地方每分鐘面對嘅人和事都格外有一份戰戰兢兢的緊張氣氛。
返幼稚園時我亦經常好驚，唔好問我驚乜我真係唔知，但婆婆總會話：「乖，你放學我接你去買雞蛋仔啦！」於是我喺幼稚園嗰幾粒鐘就發呆咁幻想啲雞蛋仔一粒粒好似舊雲咁，浮吓浮吓，一直浮到放學。婆婆天生皮膚又白又滑，接我放學時成日用佢滑嘟嘟嘅手拖實我帶我去買一底原味然後邊食邊漫步返屋企。
不過我諗今日就算婆婆有耳聽到我話學西班牙文，佢都只會聽得明以為係茶餐廳嘅西班牙奄列。冇咗婆婆嘅雞蛋仔緩和緊張氣氛，唯有放學後衝去超市同班c9爭隊排自我調劑一下。
唔知再隔n年後，我粒孫會唔會想我湊佢返學放學呢？只要佢想，我一日有氣有力有記憶都必定日日拖住佢帶佢返學，最多穩陣啲掛個地址喺條頸度，差人叔叔想幫我都容易啲。再唔係我坐喺婆婆隔離，一齊睇住我粒孫，即佢粒曾曾孫返學放學，哈～多寫意！
#我愛雞蛋仔
#我要上學去
#我和婆婆的約會
Search